Gjykata e Lartë ka dhënë të martën masën e sigurisë arrest me burg për deputetin Armando Prenga, i cili akuzohet për armëmbajtje pa leje, plagosje të rëndë me dashje dhe kanosje, pas përleshjes së armatosur në Laç, të premten e kaluar
“Nuk mund ta paragjykojmë gjykatën, por nuk justifikohet qëndrimi i klientit tim në burg në bazë të provave. Duhet të ishte i lirë. Hetimi nuk është i drejtë, nuk është ligjor dhe është i njëanshëm”, tha avokati i Prengës pas daljes nga gjykata.
Ndërkohë, Gjykata e Laçit dha sot edhe masën e sigurisë për shtetasin Gjergj Cali, i përfshirë në konfliktin e armatosur me ish-deputetin e PS-së, transmeton TCH.
Nga informacionet e fundit mësohet se, gjykata ka dhënë masën “arrest me burg” për Calin, nën akuzën e “armëmbajtjes pa leje” dhe “plagosjes”.
Ndërkohë, gjatë seancës gjyqësore Cali ka pranuar se ka pasur komunikime edhe me ministrin e Brendshëm, Saimir Tahiri.
Ndërkohë, trupi gjykues ka vendosur masën “arrest me burg” për Gazmir Jushin. Ky i fundit nuk ka qenë i pranishëm në seancë, pasi ndodhet ende i shtruar në spital për shkak të plagëve të marra.