Stacion – Qendra për Art Bashkëkohor Prishtinë ka shpallur konkursin për Çmimin “Artistët e së nesërmes” 2016 për artistët e rinj të Kosovës deri në moshën 35 vjeçare.
Ky çmim i rëndësishëm i pavarur organizohet në bashkëpunim me Residency Unlimited (RU) në Nju Jork dhe mbështetet nga The Trust for Mutual Understanding në Nju Jork.
Afati i fundit për aplikim është 26 qershor 2016.
Rezultatet e konkursit do të shpallen më së voni deri më 20 korrik 2016.
Fituesi/ ja i/e Çmimit “Artistët e së nesërmes” 2016 do të shpërblehet me qëndrim dymujor në Nju Jork, në programin rezidencial për artistë të Residency Unlimited (http://residencyunlimited.org/), gjatë periudhës prill / maj 2017, dhe ekspozitë personale në kuadër të programit vjetor të ekspozitave të Stacion – Qendra per Art Bashkëkohor Prishtinë të vitit 2017.
Artistët që punojnë në fushën e artit bashkëkohor, që përfshijnë punën në pikturë, skulpturë, grafikë, vizatim, instalacion, fotografi, video, mediat e reja dhe art performues inkurajohen të aplikojnë.
Artistët nuk mund të aplikojnë me punë në artet aplikative, dizajn, teatër, vallëzim dhe film artistik.
Në konkursin për Çmimin “Artistët e së nesërmes” 2016, mund të marrin pjesë artistët individualë dhe artistët që punojnë në grup, puna e të cilëve i plotëson kriteret e Çmimit “Artistët e së nesërmes”.
Programi i qëndrimit rezidencial mund të pranojë vetëm një artist për secilin shtet, brenda një viti.
Aplikuesit për Çmimin “Artistët e së nesërmes” duhet të kenë qenë aktivë si artistë në Kosovë gjatë së paku 3 viteve të fundit, të kenë 3-5 projekte – vepra referencë, dhe të kenë marrë pjesë në ekspozita të organizuara në institucione të artit, si galeri, qendra arti, muze, ose të kenë krijuar punë në hapësira publike.
Artistët që nuk kanë nënshtetësi kosovare duhet të jenë të njohur për kontributin e tyre në zhvillimet në skenën e artit në Kosovë në 3 vitet e fundit, dhe zhvillimi i tyre artistik duhet të ketë lidhje të konsiderueshme me Kosovën.
Artistët emigrantë duhet të jenë pjesë të komunitetit artistik të vendit dhe që kanë ekspozuar rregullisht në Kosovë së paku gjatë 3 viteve të fundit.
Procedura e aplikimit
Aplikimi për Çmimin “Artistët e së nesërmes” 2016 bëhet nëpërmes regjistrimit online, duke e plotësuar Formularin e aplikimit, dhe duke dërguar dokumentacionin e kërkuar nëpërmes Formularit të aplikimit, që gjendet në web faqen e Stacion – Qendra për Art Bashkëkohor Prishtinë (http://stacion.org/sq/Artistet-nesermes).
Procesi i përzgjedhjes
Juria ndërkombëtare do të zgjedhë tre finalistët që do të prezantojnë punën e tyre në ekspozitën e finalistëve të Çmimit “Artistët e së nesërmes” 2016, që do të hapet në muajin tetor 2016.
Fituesi/ ja e Çmimit “Artistët e së nesërmes” 2016 do të përzgjedhet në bazë të shqyrtimit të portfolios së tij/ saj artistike, projekteve dhe veprave të artit të ekspozuara në ekspozitën e finalistëve, arritjeve dhe ekspozitave të mëparshme, bashkëbisedimit me jurinë dhe potencialit të demonstruar.
Juria do të shpallë fituesin/ en në hapjen e ekspozitës të tre finalistëve të Çmimit “Artistët e së nesërmes” 2016, që do të hapet në Klubin e Boksit në Prishtinë më 20 tetor 2016.
Çmimi dhe konteksti ndërkombëtar
Çmimi “Artistët e së nesermës” është një projekt unik që u ofron artistëve të arteve pamore nën moshën 35 vjeçare mundësinë të krijojnë vepra të reja, të jenë pjesë e një procesi specifik edukativ, të kenë takime dhe prezentime për një juri ndërkombëtare, mundësi që të marrin pjesë një ekspozitë të përbashkët me finalistët e tjerë në Stacion – Qendrën për Art Bashëkohor Prishtinë, por edhe të udhëtojnë në Shtetet e Bashkuara të Amerikës dhe të përjetojnë dinamikën e skenës artistike të Nju Jork-ut, për dy muaj qëndimi në Residency Unlimited, dhe pas kthimit nga SHBA të kenë ekspozitë personale në Stacion- Qendra për Art Bashkëkohor në Prishtinë.
Qëllimi i Çmimit Artistët e së Nesërmës, i organizuar në Kosovë nga Stacion – Qendra per Art Bashkëkohor Prishtinë, është që të ofrojë mbështetje artistëve të rinj dhe të lehtësoj vazhdimin e punës së tyre duke i zhvendosur ata nga një rol margjinal në një rol qendror në shoqëri.
Çmimi “Artistët e së nesërmes” është pjesë e programit të çmimeve për artistët e rinj pamor – YVAA (Young Visual Artists Awards) – që është një rrjet i dhjetë çmimeve të ngjashme nga Evropa Qendrore dhe Lindore, dhe i cili u themelua në vitin 1989 në Çekosllovaki nga kryetari Vaclav Havel, Wendy Luers dhe artistët disidentë, që kishin për qëllim përkrahjen e ngritjes dhe zhvillimit të artit bashkëkohor dhe shoqërisë civile.
Stacion – Qendra për Art Bashkëkohor Prishtinë synon të rrisë potencialin dhe ndikimin e Çmimit “Artistët e së nesërmes” në zhvillimit e gjithmbarshme në artin bashkëkohor, në tërë teritorin e Kosovës.
Kandidatët dhe fituesit e Çmimit
Çmimi “Artistët e së nesërmes” në Kosovë për herë të parë u organizua në vitin 2002. Në edicionin e parë fitues ishte Tahar Alemdar. Në edicionet me radhë fituesit e çmimit ishin: Jakup Ferri (2003), Kadër Muzaqi (2005), Fitore Isufi-Koja (2006), Fatmir Mustafa (2007); Bekim Glloku (2008), Miranda Thaqi (2009), Loreta Ukshini (2010), Astrit Ismaili (2011), Majlinda Hoxha (2012) dhe Artan Hajrullahu (2013).
Në edicionin e fundit të Çmimit “Artistit e së nesërmës” (2014) fituese e çmimit ishte Doruntina Kastrati me veprën ” Bashkë me ty po thahen edhe lulet”/ “You are drying along with the flowers ” (2012), e cila ishte e përzgjedhur në mesin e finalistëve: Qëndresë Deda, Jetullah Sylejmani, Fidan Bejtullahu.