Ministria e Punëve të Brendshme të Kosovës, përmes një komunikate për opinionin, u ka bërë thirrje bashkatdhetarëve që vijnë për festa në atdhe, që të zgjedhin vendkalime kufitare ku ka më pak pritje, transmeton Koha.net.
Në vazhdim po e sjellim të plotë komunikatën e MPB-së.
Ju njoftojmë se për shkak të fluksit të madh për festat e fund vitit, në pikëkalimet kufitare mes Republikës së Kosovës dhe Serbisë, vërehen kolona dhe pritje më të gjata se zakonisht.
Ministria e Punëve të Brendshme, në bashkëpunim me Ministrinë e Diasporës dhe Qendrën Kombëtare për Menaxhimin e Kufijve, janë duke bërë përpjekje gjatë tërë kohës që pritjet të jenë sa më të shkurta, mirëpo jo e gjitha varet nga institucionet e Kosovës.
Andaj i lusim të gjithë bashkatdhetarët që udhëtojnë me vetura, të shfrytëzojnë edhe vendkalimet tjera kufitare, ndërsa për gjendjen momentale të kolonave, mund ta shohin në kohë reale në faqen e Ministrisë së Punëve të Brendshme, te linku: http://www.mpb-ks.org/qkmk dhe në këtë mënyrë të orientohen nga pikat ku ka pritje më të vogla.
Ju dëshirojmë mirëseardhje në vendin tuaj për festat e fund vitit, përfundon komunikata.